Rutte a ‘pèrdè memoria’ i ta insistí ku e ta papia bèrdat

DEN HAAG.-Parlamento ulandes a dediká basta ratu pa debatí ku premier demishonario Mark Rutte riba e situashon problemátiko ku a surgi durante e proseso di ‘informashon’ riba formashon di un gobièrnu nobo. Un ratu pasá a skòrs e debate ora ku un mayoria amplio a eksigí pa premier Rutte splika Parlamento ta ken a dun’e informashon ‘via via’ awe mainta.

Rutte for di un prinsipio a keda mantene ku e ta papiando bèrdat i no ta gaña. Sinembargo praktikamente tur miembronan di Tweede Kamer a insistí ku ta imposibel ku un hende por partisipá den un reunion, kaminda tur hende ta korda kua ta e fragmentonan mas importante i Rutte so ta insistí ku nèt e pida ei e no por korda.

E debate a kue un buèlta muchu mas fuerte ta momentu ku Rutte a bisa ku ta awe mainta 7:30 el a haña informashon ‘via via’ ku e dokumentunan di sekretariado di e reunion a indiká ku debidamente Rutte a papia riba e posishon di Omtzigt. Parlamentarionan a para ketu riba e pida ‘via via’ i a kuminsá eksigí di Rutte ken ta esun ku a dun’e informashon awe mainta ‘via via’.

Manera ta konosí a surgi un problema serio na momentu ku un fotograf di prensa a saka potrèt di dokumentunan den man di un di e informadónan pa e gobièrnu nobo (verkenners). Riba e dokumentu por a mira ku a papia riba e posishon di Omtzigt sea komo minister òf otro kaminda. Esei a pone ku a disidí na kambia informadó pa sigui ku un proseso ‘limpi’.

Un kantidat relativamente grandi di miembronan di Tweede Kamer a kuminsá puntra ta kon Ulanda por sigui ku un premier ku no tin bon memoria i banda di esei a kuminsá mustra riba e echo ku aparte di mal memoria ta mustra ku Rutte ta gaña hopi i esei no ta aseptabel. Por sigui e debate na http://Tweedekamer.nl