WILLEMSTAD.- Tweede Kamer a disidí siman pasá djaweps durante un asina yamá “regeling van werkzaamheden”, un seshon plenario pa plania trabounan di e parlamento den periodo benidero, ku ta trata e presupuesto supletorio insidental di Ministerio di Asuntunan Interno i Relashonnan den Reino promé ku elekshon dia 22 novèmber awor. E presupuesto supletorio aki ta relashoná ku e fiansa di 600 mion euro ku Hulanda ta ofresé Kòrsou i St. Maarten komo solushon duradero pa kompania di seguro ENNIA i tambe algun aspekto di maneho sosial pa islanan BES.
Tabata miembro di Tweede Kamer pa D’66, Alexander Hammelburg ku den e reunion a hasi e proposishon pa trata e presupuesto supletorio insidental. Tweede Kamer ta drùk ku stipulá tópikonan di prioridat ku mester trata promé ku elekshon. Den un kantidat di proposishon ku a subi mesun esun pa entre otro trata e kambio di presupuesto pa hasi posibel ku ta fia Kòrsou i St. Maarten 600 mion euro a haña aprobashon di un mayoria.
Den un asina yamá “wetgevingsoverleg” (debate legislativo) ku e komishon fiho di Relashonnan den Reino a tene mas ku 1 siman pasá ku sekretario di estado, Alexandra van Huffelen el a trese dilanti e intenshon di gobièrnu pa bini Tweede Kamer ku e proposishon aki pa fin di òktober pa asina tin un desishon riba e fiansa promé ku elekshon di 22 novèmber. Pero promé ku ta asina leu Kòrsou mester tuma un desishon pa mas tardá 30 sèptèmber awor si e ta di akuerdo ku e fiansa.
Promé minister di Kòrsou Gilmar ‘Pik’ Pisas sinembargo ta nenga di bini parlamento di Kòrsou pa duna informashon riba kondishonnan di e fiansa ku ta negoshando ku Hulanda. Frakshonnan di MAN, PAR i Trabou pa Kòrsou ta akusá Pisas ta aktua di forma no demokrátiko i ku no ta aseptabel ku e ta nenga di bini parlamento ora parlamento pidi pa e ta presente pa duna informashon.
Djaweps awor promé minister di St. Maarten si lo ta den un reunion di Komishon Sentral di parlamento di St. Maarten pa duna informashon detayá di e negosiashonnan. E tópiko di e reunion ta: “Detailed outline of the ongoing ENNIA situation, the proposed ENNIA loan mentioned in the media by State Secretary Van Huffelen, the impact to the national budget, and Government’s intentions towards the situation in light of the September 30, 2023, deadline”.
Mirando ku gabinete Rutte di Hulanda ta demishonario i a yama elekshon pa 22 novèmber awor e agènda di Tweede Kamer ta èkstra yen pa trata di atendé tópikonan mas urgente promé ku fin di òktober mirando ku Tweede Kamer ta baha ku reseso pa elekshon di 27 òktober pa 22 novèmber. Hammelburg a bisa ku ta importante pa trata e presupuesto supletorio insidental pa asina tuma desishon pa aloká 30 mion èkstra pa regla oumento di huurtoeslag, kumpli ku metanan di medio ambiente, eradiká pobresa, transporte públiko pagabel i sosten pa banko di alimento (“voedselbank”) pa Islanan BES. Alabes el a menshoná pues e fiansa di 600 mion euro pa Kòrsou i St. Maarten pa kapitalisá ENNIA.
“Tur e tópikonan aki meresé nos atenshon inmediato”, Hammelburg a bisa. Su proposishon a haña sosten serka práktikamente tu frakshon den Tweede Kamer. “Nos ta di opinion ku e hendenan ku ta biba den e region aki no mester sufri debí ku tin elekshon na Hulanda”, Stephan van Baarle di frakshon di DENK a bisa.
Roelien Kamminga di frakshon di VVD a bai di akuerdo ku e proposishon i alabes a sugirí pa trata e proposishon di fiansa pa kapitalisá ENNIA den un debate legislativo (“wetgevingsoverleg”). E parlamentario a sugirí na mes momento pa Van Huffelen eksplorá maneranan alternativo pa sigurá sufisiente sosten pa e fiansa pa ENNIA.
Pieter Heerman di frakshon di CDA a rekonosé ku e fiansa pa ENNIA ta “hopi importante” i a bisa ku debate legislativo ta un “bon opshon” i ku esaki por tuma lugá promé ku trata e presupuesto 2024. “Di e forma aki por trata e fiansa pa ENNIA. Tratamentu di e presupuesto di Asuntunan Sosial i Labor ta importante pa islanan BES relashoná ku implementashon di un mínimo sosial i e konseho pendiente di e Komishon di Mínimo Sosial pa Hulanda Karibense.”
