DEN HAAG.-Premier Mark Rutte un ratu pasá a anunsiá medidanan drástiko pa e komunidat ulandes relashoná ku e pandemia di Covid-19. E situashon di Covid no ta bai niun tiki bon na Ulanda, pasobra e kantidat di hendenan infektá ta oumentando ku gran kantidat pa dia, asina premier Rutte a duna di konosé. Na opinion di Rutte, si no kue kurpa lihé Ulanda lo bai topa ku situashonnan ferfelu manera ‘lockdown’ kompletu kombiná ku hopi hende malu tur kaminda loke ta pone un preshon enorme riba e sektor i institutonan di salubridat. Ya kaba institutonan ta mustra ku den un senario mas avansá hopi hende mas lo pèrdè trabou loke lo tin impakto grandi riba ekonomia.

E konseho nobo ku gabinete Rutte a haña i ku mester implementá lamentablemente ta ku no ta permití pa organisá niun enkuentro den famia di mas ku seis hende. Ta den esfera privá e problema ta mas grandi pasobra den establesimentunan di horeca hendenan i doñonan ta kumpli korektamente ku tur e eksigensianan. Ta na kas famianan ta topa otro den ambiente di hasimentu di aña, kasamentu i otro aktividatnan. Tambe a konsehá pa traha na kas mas tantu posibel, ya kaba a keda demostrá ku esei ta mas efektivo. Skolnan tambe ta habri pero ta responsabilidat di kada hende pa mantené skolnan un lugá sigur. Si muchanan tin síntoma laga nan keda kas i si den un famia tin hende ku síntoma tambe tene e muchanan na kas, asina Marka Rutte a duna di konosé.