TILBURG.- Un ratu pasá a drenta e konfirmashon di e prome kaso ofisial di un persona infektá ku e corona vírus na Ulanda. Rijksinstituut voor Volksgezondheid en Milieu (RIVM) a konfirmá ku awe un persona na Tilburg a tèst positivo pa e coronavirus.

Ta trata di un hende hòmber ku ta interná den hospital Elisabeth-TweeSteden Ziekenhuis na Tilburg. E hòmber tabata na e region Lombardie na Italia. RIVM no ta duna detayenan di e pashènt. E instituto ulandes ta sigui informá ku ta trata di un hòmber di alrededor di 50 aña. Mesora a kuminsá investigashon ken e hòmber aki tabata den kontakto kuné.

E coronavirus ta plama pa medio di tosamentu i tambe ora hende nister. Pa loke ta trata Kòrsou ta hopi importante pa tur hende mantené nan mes bon informá kon pa prevení. Riba e website di gobièrnu por haña hopi informashon. Mas detaye den edishon di EXTRA.