Desishon ku tin impakto serio

WILLEMSTAD.-Debí na e oumentu kontinuo di kasonan positivo di Covid na Kòrsou gobièrnu ulandes a kaba di kódigo oraño pa Kòrsou. Pues Kòrsou ta pasa di kódigo hel pa oraño kual ta enserá e rekomendashon ku si un hende no nesesariamente mester bai Kòrsou pa e no bai.

E konsekuensia di esaki lo ta hopi serio pa sektor di turismo di Kòrsou, asina Ofisina di Turismo a kaba di splika EXTRA. Esnan ku ta sigui kobra nan salario tur luna lo no preokupá si bini un ‘lockdown’ òf loke sea sosodé ya ku nan si lo por sigui hasi kompra i sigui trankil, pero e echo ku ménos turista bini òf ‘lockdown’ lo tin konsekuensia ku hopi hende lo no tin entrada pa sigui biba.

Un informe for di Ulanda di awe 8 di desèmber ta indiká ku e kantidat di kontagionan a oumentá di forma drástiko na Kòrsou. Esei ta subi e nivel di rísiko pa kontagio. Den e kuadro e sentro ku ta kontrolá situashon rondó di e pandemia RIVM a hasi kambio na e kódigo pa Kòrsou, a kambi’e di hel pa oraño.

E rekomendashon ta pa si un hende no nesesariamente mester bai Kòrsou, pa no hasié. Tambe a mara na esaki ku na momentu ku un persona bai Ulanda bek for di Kòrsou e mester bai 10 dia den karentena na kas.