WILLEMSTAD.- Entretantu praktikamente tur kliente di ministerio di SOAW ku ta bini na remarke, a risibí nan karchi nobo di sosten pa kuminda. Na tur a repartí via C-Post, 7.047 karchi i via ofisina di SOAW i kasnan di bario a entregá 3.433 karchi nobo. Tin 563 persona ku falta pa tuma nan karchi nobo ainda. E personanan ku no a tuma nan karchi nobo ainda, tin te ku djabièrnè awor 3 di sèptèmber 2021 pa hasi esaki. Eks kliente di Krus Kòrá i èks risibidó di karchi (bieu) di kuminda SOAW, por hasi esaki na ofisina prinsipal di SOAW na Prinsenstraat 86 den Punda. Risibidónan di ònderstant ku no a tuma nan karchi nobo ainda, por pasa na nan kas di bario na Punda/Banda Ariba, Otrobanda/Banda Bou, Santa Maria i Brievengat pa tuma nan karchi nobo. Lo entregá tur karchi ku sobra despues di djabièrnè 3 di sèptèmber, bèk na banko i lo no por hasi uso mas di nan.

Ministerio di SOAW ke kòrda tur usuario di e karchinan nobo, ku konforme reglanan stipulá i ku ta konosí kaba, ku ta estriktamente prohibí pa hasi mal uso di nan karchi di sosten pa kuminda. Por usa e karchi solamente pa hasi kompra na tur e supermerkado i minimarketnan ku tin riba e lista ku a risibí huntu ku e karchi nobo. Tene kuenta ku SOAW ta kontrolando i na momento ku nota kasonan di mal uso, lo blòkia i retené e karchi mesora. Esun ku hasi mal uso di su karchi lo mester responsabilisá su mes i lo pèrdè derecho riba su karchi di sosten.
Djaluna 6 di sèptèmber lo rekargá e karchi nobo di sosten pa kuminda, pa e luna entrante.

Ministerio di SOAW ta gradisí un i tur pa nan koperashon.