WILLEMSTAD.- Ministerio Públiko a kaba di informá di forma ofisial ku e bewaker E.R.S. ta rekobrá su libertat awe mèrdia. E mester keda na disposishon di hustisia. E ta keda sospechoso, di akuerdo ku desishon di wes komisario.
OM ta informá ku e bewaker E.R.S. a drenta awe, djaweps 17 di mei 2018, den su periodo di kustodia (bewaring). A present’é awe mainta a, konforme Kódigo di Prosedimiento Penal (Wetboek van Strafvordering) na wes-komisario (RC). Esaki pa su ròl den un insidente den mardugá di djadumingu 6 di mei pa djaluna 7 di mei na Porto Mari na unda e tabata traha komo bewaker. El a los tiru riba 2 persona riba e tereno. Esaki, di akuerdo ku e investigashon, ku un arma di kandela ilegal. E.R.S. ta ser akusá pa Ministerio Públiko (OM) di dos biaha intento di homisidio i poseshon di un arma di kandela ilegal.