CARACAS.- Un informashon di último ora ku EXTRA ta dispone di dje ta indiká ku djis un ratu pasá presidente di Venezuela Nicolas Maduro a duna òrdu pa sera frontera ku e islanan ulandes den Karibe, Kòrsou, Aruba i Boneiru. Esaki ta manera EXTRA a informá for di ayera komo un posibilidat ku e presidente venezolano por akudí na dje. No ta promé bia ku Maduro ta aktua di e forma aki kontra Kòrsou i e otro islanan. E fronteranan di parti marítimo ta keda será te un próksimo aviso, asina e presidente a deklará na televishon un ratu pasá.

Algun luna pasá tambe Maduro a tuma tal desishon di forma unilateral. E momentu ei a kuminsá hasi preparashonnan pa buska fruta i berdura for di otro paisnan. E distansia ku otro paisnan ta mas largu sinembargo Kòrsou a haña mihó kalidat di fruta i berdura den e dianan ei. EXTRA ta sigui vigilá e desaroyonan pa tene nos lesadónan informá. Miéntras tantu tin reunion den Parlamento di Kòrsou pa trata hustamente posibel konsekuensianan di un partisipashon di Kòrsou den yudansa humanitario na Venezuela i na sede di ABVO tambe tin reunion di ámtenarnan.

UPDATE: espasio aéreo

Informashon di último ora ta ku pa loke ta espasio aéreo esei si no ta sera ainda. Avionnan ta bula normalmente.