WILLEMSTAD.- Un biaha mas Plaza Hotel ta bai na findishi pa keda bende. Segun nos konteo esaki ta di tres biaha ku e hotèl ta ser pone na findishi pa keda bendé. Asina atrobe Girobank ta purba di haña su plaka ku el a fia e hotèl.
Dùrwarder den aviso publiká den EXTRA di djasabra ta hasi yamada na sr. Barney Ivanovic of Ocean Side Management N.V. pa respondé pa benta di e hotèl ku lo bai tuma lugá dia 17 sèptèmber próksimo na kantor di notaris Naaldijk.
Tambe ta hasi yamada na e kompania Bayside Holding Group Limited pa ku e findishi.
E último findishi a tuma lugá dia 8 novèmber 2018. Pero despues di algun siman a sali na kla ku e kumpradó merikano Tom Bolera no tabatin garantia di banko.
Dia 8 di novèmber e hotèl a keda bendé ku Bolera pa e suma di 13.5 mion florin. Pa di tres biaha e findishi di e hotèl ta kai na awa i ta un desepshon grandi p’esnan envolví.
Loke a pone konfiansa den Bolera ku tabata úniko kumpradó dje hotèl dia 9 di novèmber, ta pasobra el a pone e depósito ku a eksigí.
Bolera tabatin sosten for di un grupo di invershonista di Merka, pero ku a lag’é na kaya.
E intenshon tabata pa na momentu e grupo optené e pèrmitnan nesesario, ta restourá e hotèl i tambe e “boogjes”-nan etc.,
Bolera ta bon konosí ku e hotèl, pasobra na 2010 Bolera a traha komo general manager den Plaza Hotel i a hasi trabou di reorganisashon den e hotèl. For di e tempu ei Thomas Bolera a bisa ku su kurason a keda pa e hotèl. Lo no a kambia kara dje hotèl. E hotèl ta keda asina manera e ta.
For di promé mitar di 2017, Hotèl Plaza a dal su portanan sera debí na debe grandi serka Aqualectra. Aqualectra a kita koriente for di e hotèl ku konsekuensia e hotèl a dal su portanan sera.
Hasta e instituto Cinex Curaçao tambe a hinka nan skouder bou di e proyekto i a yuda buska invershonista pa por a kumpra e hotèl. Pues un biaha mas e hotel ta na findishi.

LAGA UN KOMENTARIO

Please enter your comment!
Please enter your name here