WILLEMSTAD - Un biyete di 500 florin di Kòrsou di 1954 a bende resientemente pa un suma eksepshonal di 24 mil dollar durante un findishi di kolekshonista di biyete i moneda ku a tuma lugá na Chicago. E promé oferta tabata fihá mil dollar pero finalmente e benta a generá 24 mil dollar. No a revelá ken a kumpra e biyete. Por sierto durante e mesun findishi un biyete di Kòrsou di 100 florin di e mesun serie a bende pa 18 mil dollar.

Ta bon pa splika ku e biyetenan e tempu ei tabata saká pa De Curacaosche Bank, e banko sentral di e islanan di e tempu ei den era kolonial. E kolonia ulandes di 6 isla den Caribe tabata yama Curaçao en onderhorigheden. E islanan a haña outonomia na desèmber 1954, un luna despues ku e serie di biyete aki a subi merkado. Na 1962 e biyetenan a kaduká i a introdusí De Antilliaanse Gulden. Irónikamente te awe e moneda aki ta esun ofishal pa Kòrsou i Sint Maarten no opstante ku e islanan a plama for di otro na 1986 ku salida di Aruba i na 2010 ku un status konstitushonal nobo den reino.

Ta konosí ku biyetenan di Kòrsou (i Antia) ta masha kotisá rònt mundu meskos ku stampianan di Kòrsou. Nan tin balor inmenso i hasta un tempu tabatin negoshi pisá di algun hende den sirkuitonan ofishal. Den pasado a determiná ku e negoshi tabata pasa inkluso via di individuonan di instanshanan ofishal ku a saka un bon boká for di e negoshi aki di stampia.

E findishi a tuma lugá na Chicago ku e nòmber Heritage Auctions’ Central States World Currency Signature Floor Sale. E findishi ku a aseptá tambe ofertanan via di internet, segun e revista Numismatic News, a demostrá ku e benta di plaka di papel for di kolekshonnan di rònt mundu ta un negoshi stabil. Na tur a ofresé 827 biyete ku a generá 1,732,096  dollar. Di e kantidat di biyete ofresé no menos ku 33 a haña kumpradónan ku a paga mas ku 10 mil dollar pa un, inkluyendo e dosnan di Kòrsou. E preis mas haltu a paga pa un biyete di 1920 for di Siria pa kua a paga 60 mil dollar. Un biyete di 1899 for di Egipto a generá 37.300 dollar i un di Canada a generá 26.400 dollar. Un biyete di tempu ku Hawaii ainda tabata un repúblika na 1897 a generá 19.200 dollar.

E revista ta bisa ku e ofertanan pa benta di e biyetenan di Kòrsou a lanta kuriosidat serka esnan ku a partisipá den e findishi. E biyete di 500 florin ta esun mas haltu di e serie ku tin tambe 250 i 100 florin. Un kos ku a lanta kuriosidat di kolekshonistanan ta ku a lote di biyete aki a sali den kantidat masha chikitu, loke hopi biaha tin un aspekto ku ta oumentá balor di un biyete. E kalidat di e biyete ofresé tambe ta ekselente loke a kontribuí na su preis. E findishi pa e biyete di 500 florin a kuminsá na mil dollar bai kaba te na 24 mil dollar pa e biyete aki. Esun di 100 florin a kuminsá na 500 dollar bai kaba te na 18 mil dollar. (foto Heritage Auctions)