WILLEMSTAD.- Riba fotonan por mira un bista di e promé mulina na Koraal Tabak. E mulinanan di bientu nobo ta 150 meter haltu, i tin 3 ala. Kada un ala ta 72 meter largu. E mulinanan aki tin un diseño nobo. Riba kada ala tin djente i nan funshon ta pa redusí zonido i hasié mitar. E mulinanan aki ta duna mas tantu energia. Nan ta mas grandi ku esnan na Tera Kòrá. Dia 6 di ougùstùs e promé transporte di e partinan di mulina di bientu a inisiá, saliendo for di tereno di Amstel i bai Koraal Tabak. Aqualectra, NuCapital, Vestas i Ter Linden ta enkargá ku e proyekto di parke di mulina na Koraal Tabak aki.