WILLEMSTAD. – Último tempu outoridatnan polisial a bin ta nota un oumento di uso di un droga relativamente nobo. Ta trata aki di e droga di fiesta ku ta hiba e nòmber 3-methylmethcathinone (3-MMC).

3MMC tambe ta wòrdu yama 'Poes' òf '3M' i generalmente e ta wòrdu bende na puiru blanku na forma di kristal. E droga aki ta riba merkado for di 2012. Masha poko investigashon a wòrdu hasi, pues tin tiki informashon tokante di 3-MMC. Benta di droga no ta un sekreto na sitio nan konosí pa fiestanan tur siman ku multitut grandi di hende, gran mayoria ta turista, hóbennan ku ta bin kore nan periodo di stage pero tambe lokalnan.

Un fuente a indiká na EXTRA ku no ta nada straño ku koka ta keda ofresé pero lokual a bin ta hala atenshon ta e presensia di e asina yama ‘designerdrug’ 3-MMC. Efekto nan ku e droga aki tin ta ku e usuario nan ta sinti nan alerta, felis i no ta sinti kansansio. Nan ta sinti nan mas sosial, nan ta haña mas ‘self- esteem’ i tin biaha mas deseo seksual.

Segun sikólogo Verda Betrian di Fundashon pa Maneho di Adikshon (FMA) no ta konosí kuantu hende ta usa e droga na Kòrsou. Pero mayoria di e hende ku ta usa e droga ei ta relativamente yòn, entre 18 i 25 aña). Segun Betrian no ta hopi konosí tokante e efektonan. Na su opinion spesialmente hóben mester ta hopi kouteloso.

3-MMC a wòrdu evaluá pa sientífikonan na 2021. E sientífiko nan a analisá e riesgo nan di 3-MMC. Pero esaki ta hopi difísil paso no tin hopi informashon tokante e droga. E konklushon tabata ku no tabata tin sufisiente informashon pa determiná eksaktamente kon grave e riesgo nan ta.

E promé estudio ta mustra ku tin un oumento den e uso di 3MMC. E durashon di e funshon di 3MMC ta entre 3 pa 6 ora. E efekto nan por ta algu similar na MDMA i kokaina pero e ta mas barata riba merkado. Manera a indiká kaba ainda no tin un estudio spesífiko hasi riba e rísiko nan ku e droga aki tin pa hende. Loke si ta klaro ta ku e dosis haltu i e uso kombiná ku otro droga òf alkohòl por oumentá e ríesgo. Pues e usuario nan di e droga aki ta nan mes ‘proef konijn’.

Efekto nan negativo ku e usuario nan ta eksperensia ta:

Temperatura korporal hopi haltu (keintura), Miedu/pensamentu deskonfiá, Halusinashon, Walmentu di stoma, Dolor di kabes, Intrankilidat, Batimentu di kurason, Deseo fuerte pa bolbe us’e.

Lokual ta hasi e droga aki asina adiktivo ta despues di hasi kualke ehersisio bo ta sinti ku bo mester di mas, debí na su efekto nan bo ta sinti un nesesidat fuerte di sigui us’e. Ya bo no ta sinti bo motivá mas sin e droga. Si bo no usa e droga bo sinti bo desmotiva, bo ta pèrdè gana den hasi mayoria kos te asta bo obligashon nan. Esei ta pone ku e usuario nan ta bira dependiente na e droga aki i ta sinti ku sin dje no por funshoná. Outoridatnan ta hañando kada bes mas señal di uso di e droga nobo aki. Importante pa hóbennan no balotá e efekto i peliger di e droga aki.