Liberia-Peters Den karta di 2022 pa lider i direktiva 

WILLEMSTAD.- Ta un maneho di semper di partido Nashonal (PNP) ku ora un funshonario hañ’é den kualke situashon fèrfelu, ku e ta bai ‘den sombra’ te ora ku e situashon klara. Asina Maria Liberia-Peters a trese dilanti den un karta fechá 20 sèptèmber 2022 pa direktiva i lider polítiko di e partido.

Segun Liberia-Peters a trese dilanti e presidente di e momentonan ei, Ramon Chong no a apliká e bon kustumber aki i ku segun konseho di partido ainda e kaso den korte kontra su nombramentu komo minister lo ta andando. A manda e karta 2 dia promé ku partido mester a tene un reunion pa eligí miembronan nobo di direktiva.

Apesar ku e reunion no a sigui debí na e mal tempu ku tabata menasá Kòrsou na e momentonan ei, a konstatá ku apénas 48 ora promé ku e reunion mester a tuma lugá ainda e kandidatonan pa drenta e direktiva nobo no tabata konosí pa miembronan. Liberia-Peters na 2022 a ekspresá e deseo pa promé ku e direktiva bieu baha, miembronan haña splikashon riba un kantidat di asuntu.

Sinembargo ta e remarke di e maneho di semper di PNP, esta ku un funshonario ku hañ’é den kualke situashon fèrfelu ta bai ‘den sombra’, ta halando atenshon atrobe. Esaki den kuadro di un keho ku a entregá kontra minister pa PNP, Ruisandro Cijntje relashoná ku un suseso ku a tuma lugá durante e Hak’é Summer Festival.

Cijntje na promé instante a indiká riba retnan sosial ku e lo tene un konferensia di prensa pa splika kiko a pasa eksaktamente. E ta para riba su inosensia i ta bisa ku ta akus’é di un akto ku e no a kometé, esta di a agredí un persona femenino na e evento di Hak’é.

Sinembargo despues di a risibí konseho hurídiko i teniendo kuenta ku e investigashon ainda ta andando e minister a disidí ku e no ta pone e konferensia di prensa mas. E ta bisa ku su meta prinsipal ta pa kolaborá plenamente ku e investigashon i ta sigur ku e bèrdat lo prevalesé.

“Mi ta lamentá ku algun di un manera òf otro a forma un opinion sin sa tur dos banda di e medaya, pero mi ta konfia ku tempu i hustisia lo klarifiká e echo i lo permití ku e bèrdat sali na kla.”

Foto:

...Maria Liberia-Peters...