WILLEMSTAD.- Ayera den oranan trempan di mardugá, e Tim enkargá ku investigashon relashoná ku kiebro den kas i bibiendanan parti pariba a sali i a tene un entrada hudisial na Fuik.

Na e adrès en kuestion a detené un hòmber di 40 aña di edat, sospechá di vários kaso di ladronisia kometé resientemente. Tambe a konfiská arma, i un kantidat grandi di diferente artíkulo den e bibienda aki. E agentenan a yena sigur tres vehíkulo ku e diferente artíkulonan.

Alrededor di sink’or mainta, huntu ku Tim di Aresto, e reshèrshinan a drenta den e bibienda na na Weg naar Fuik. Unabes den e kas aki, nan a lista tur kaminda i einan a konfiská diferente artíkulo hòrtá manera entre otro: Vários telefòn selular, diferente tablet, chaleko anti-bala, balanan skèrpi, televishon, diferente kuadro, skopèt di airu i un arma outomátiko. Na e adrès en kestion a detené e hòmber sospechoso E.E.K.B. di 40 aña di edat nasé na Kòrsou.

A presentá e hòmber aki dilanti un fiskal ouksiliar ku a ordená su enkarselashon pendiente mas investigashon.