WILLEMSTAD.- E kaso di atrako/asesinato ku a tuma lugá den e área di Schelpwijk ta otro kaso hopi lamentabel. Atrobe un hende den su kas, un hòmber trahadó, hortikultor(hovenier) di profeshon a pèrdè su bida ora ku e malechornan ku a atraká e dos asiátikonan den e kompleho di flèt a disidí na kibra porta di otro flèt pega eibanda i a topa ku e habitante. Manera ta indiká a los bala dirigí riba dje i kita su bida.

Ronaldus Wihelmus Molenaars di 53 aña a pèrdè su bida na man di algun atrakadó. Manera EXTRA a informá, kuater hòmber ku kara tapá a bai e kompleho di apartamentu den Kaya Karko na Schelpwijk pa atraká dos hòmber asiátiko. Un di e asiátikonan a resultá heridá ora ku el a resistí ku e atrakadónan ta kita su propiedat.

Molenaars tabata den su flèt i ora ku e atrakadónan a kibra porta bai paden nan a topa kuné i tir’é ku sanger friu mata. Molenaar a muri na e sitio. Polis a indiká for di ayera ku nan ta konta riba sosten di komunidat pa haña informashon kiko a pasa den e kaso aki ku e speransa di por solushoná e kaso.

Ronaldus Wihelmus Molenaars di 53 aña tabata un hortikultor, pues un hende ta traha den kultivo di plantashon, drecha tereno pa plantashon, ta pone sistemanan di pipa di awa pa mata. E hortikultor ta traha laguna artifisial, kòrta mata, pone i mantené áreanan bèrdè. Foto