WILLEMSTAD.-Informashon ku a yega mesa di redakshon di EXTRA ta indiká ku Kòrsou tin un morto mas posiblemente debí na Corona vírus. E informashon ta indiká ku ta trata di un persona nase na 1948 ku ta den un kas di kuido, ku ta duna tratamentu no solamente na hende di edat avansá pero tambe otronan ku ta den sierto kondishon.

Awe mainta EXTRA a informá ku tin dos morto relashoná ku Covid den hospital CMC i awor por bisa ku tin un kaso mas, esta un morto mas debí na Covid-19. Ya kaba e instituto a tuma tur klase di medida di higiena i tambe medidanan di seguridat. Anteriormente kaba e instituto aki riba Helmin Wiels blvd tabata den notisia kaminda e gerensia a splika kon ta manehá e situashon di personal, awor ku Corona ta pone un preshon enorme riba nan tahadónan. EXTRA lo suministrá mas detaye den transkurso di dia.