WILLEMSTAD.-  Hustamente 1 siman pasá, Kuerpo Polisial di Kòrsou a publiká un video ku a keda traha, kaminda ta duna informashon riba e kaso di asesinato ku a tuma lugá dia 17 di sèptèmber di aña pasá na Kaya Seru Machu na Fuik.

Riba e dia ei 1 òf mas persona ku posiblemente intenshon di kometé un atrako a terminá kitando bida di e dama ansiano di 81 aña Cecilia Alexander.

Mirando ku for di despues ku e kaso a tuma lugá no tabatin ningun pista ku por kondusí na esnan responsabel pa e akto tristu aki, Kuerpo Polisial a publiká e video i na mes momentu a informá ku Ministerio Públiko a pone un suma di Fl.10.000 disponibel pa e tep di oro.

Awe un siman despues, Kuerpo Polisial a risibí hopi tep i asta por bisa ku un ora pa otro detenshon por bai kai.

Esaki debí na sierto di e tepnan ku a drenta ku ta duna e kaminda eksakto pa kana.

Di otro banda mester bai verifiká si e otro tepnan tur ta kuadra ku realidat.