WILLEMSTAD - Den luna di sèptèmber i òktober 2016 Ofisina Sentral di Statistik (CBS) a tene un Enkuesta di Forsa Laboral (AKO) na Kòrsou. AKO ta un enkuesta ku CBS ta tene regularmente bou di kasnan di famia ku e meta pa midi e último desaroyonan riba merkado laboral. Ta trata di desaroyo di e porsentahe di desempleo, e grado di partisipashon riba merkado laboral, e kantidat di persona ku ta traha i e kantidat di persona ku ta buska trabou aktivamente.

Resultado di e enkuesta ta duna un bista di e desaroyo ku a tuma lugá den e periodo entre sèptèmber - òktober 2015 i sèptèmber - òktober 2016.

E porsentahe di desempleo na sèptèmber-òktober 2016 ta 13,3 porshento. Kompará ku 2015 (11,7%) esaki ta un subida di 1,6 punto porshento. Den edishon di EXTRA mayan lo tin mas detaye di e enkuesta aki di CBS.