WILLEMSTAD.- “E dia a yega kaminda nos ta pasa operashon di nos Dòk pa Damen Shiprepair & Conversion Curaçao. Ku durante e último lunanan kada un di nos den su propio forma a duna un granito pa awe nos por dal.” Asina minister di Desaroyo Ekonómiko Eugene Rhuggenaath a bisa ayera durante selebrashon na Dòk. Damen a tuma over gerensia di Curaçao Drydok Maatschappij (CDM). Esaki a tuma lugá ku kambio di bandera. Bandera di CDM riba tereno di Dòk ayera anochi a keda kambiá dor di bandera di Damen. Selebrashon a tuma lugá na Dòk ku tur trahadó i hopi invitado di mundu finansiero i polítiko. Segun Rhuggenaath: “Despues di 30 aña nos Dòk ta subi kaminda pa por ta grandi atrobe riba tereno di astiero. Huntu ku Damen nos ta bira atrobe un di e astieronan mas notá den mundu. Esei ta sigur. E aliansa stratégiko aki ta brinda nos e oportunidat pa no únikamente salba nos Dòk pero mas p’esei ta nifiká un vershon pa nos ta konstruí un futuro briante. Esaki pues ta un logro pa Kòrsou. Un logro di nos tur.” Rhuggenaath: “Un di e logronan mas grandi ta mantenshon di kuponan di trabou den nos Dòk. Esaki kombiná ku nos hóbennan por drenta i haña formashon pa nan tambe tin un futuro den nos astiero. Esaki ta duna perspektiva ku nos yunan di tera ku por sigui gosa pa hopi aña mas di trabou den nos Dòk.” Rhuggenaath a gradisí direktiva di sindikato PWFC pa e “aporte konstruktivo” den henter e proseso pa konkretisá e partnership stratégiko ku Damen.