WILLEMSTAD.- Minister di Salubridat, Medio Ambiente i Naturalesa Suzy Camelia-Römer resientemente a reuní ku direktiva di Asosashon di Dòkternan di Kas (CHV). ‘Reunion a bai bon. Nos a pasa diferente konsepto ku ta biba serka nan. Ta kosnan ku nan ke desaroyá, por ehèmpel nan ke desaroyá un Centrale Huisartsenpost, ku ta un pòst sentral pa dòkternan di kas den e hospital nobo.’

Camelia-Römer ta splika ku e ta riba mesun liña. ‘Pasobra tantu hospital, dòkternan di kas i spesialistanan a splika mi ta un hopi bon idea. E ta mas fásil pa wardanan di wikènt ku dòkternan di kas tin. E hende ku bin, ku ta malu, direktamente ta haña informashon i nan por haña yudansa mas profundo inmediatamente, si ta nesesario.’ Camelia-Römer: ‘Si médikonan duna mi un rekomendashon ku argumentonan, mi ta habrí pe. Uniko kos ku nos ta puntra dòkternan di kas si mester tin tres pòst, mi ke men un na Bándariba, un na Bándabou i un na hospital. Of solamente un na hospital. Ku esaki ta importante si e pòst ta alkansabel pa tur hende. E asosashon a splika mi kuantu dòkternan ta eksigí si bo krea tres pòst. Na promé instansia nan a proponé pa un pòst, pero nan lo traha un modèl pa tres pòst tambe. Nos lo wak esei mas profundo.’

Segun e minister di Salubridat ‘den kuadro di hospital nobo ta importante ku komo minister di Salubridat bo tin un bon palabra ku henter e sektor médiko. Ku ta nifiká dòkternan di kas, pero tambe spesialistanan i tambe instansianan manera Betesda, Hospital Atvènt etc. Ku ta henter un kadena ku bo mester deliberá komo minister di Salubridat. Deliberashon ku Asosashon di Dòkternan di Kas ta forma un parti importante di e kadena.’