WILLEMSTAD.- Bou di direkshon di fiskal di Parkèt di Promé Instansia di Kòrsou, ámtenarnan di investigashon ligá ku e tim di Divishon Kriminalidat Organisá (Divisie Georganiseerde Criminaliteit ’DGC’) di KPC ta investigando asesinato di e rèper yu’i Kòrsou, defuntu Ruchendell “Boechi” Windster, asesiná riba 9 di desèmber 2022 na Kòrsou.

Awe mainta na Kòrsou den kuadro di e investigashon ‘Hummer’, reshèrshinan di DGC i na Hulanda e tim di asistensia hurídiko di reshèrshi nashonal (Landelijke Recherche) na Rotterdam a realisá diferente akshon.

Un hòmber di inisial C.C. a keda detené na Hulanda riba sospecho di su envolvimentu den e asesinato. Mesora despues a tene un entrada hudisial na e residensia kaminda e ta permanesé.

Na Kòrsou tambe tres (3) entrada hudisial a tuma lugá den e barionan di Seru di Kandela, Noord Roozendaal i Mahuma.

Durante e entradanan hudisial a konfiská diferente artíkulonan ku ta di interes pa e investigashon.

E investigashon ta kontinuá i no ta ekskluí mas detenshon