WILLEMSTAD.-  Tur aña di nobo durante selebrashon di fin di aña i relashoná ku tiramentu di klapchi,  vários insidente ta tuma lugá di kual e víktimanan ta akudí na poli pa risibí promé asistensia médiko.

E aña aki no tabata eksepshon.

Bosero di Sehos a duna di konos’é ku entre 24 di desèmber 2018 pa 1 di yanüari 2019, un kantidat di 4 persona a registrá na poli pa kemaduranan risibí dor di vürwèrk.

El a splika ku ta trata di dañonan relativamente leve di kual niun hende no mester a keda interná den hospital.

Segun e bosero, e persona di mas yòn ku a keda registrá te ainda e aña aki tin 8 aña, miéntras ku esun di mas grandi tin 19 aña.

Kompará ku aña pasá, e persona di mas yòn tabatin 8 aña i esun di mas edat tabatin 63 aña.

E bosero a sigui bisa ku e edat yòn ta basta remarkabel i ku mayornan durante e periodo di klapchi, mester pone mas atenshon na nos muchanan pa asina evitá e tipo di insidentenan aki.

Mas aleu e bosero a duna di konos’é ku pa loke ta trata aksidentenan ku a tuma lugá den e mesun periodo di 24 di desèmber pa 1e di yanüari,  14 persona a registrá na poli di kual 5 a keda interná i e sobrá personanan por a bai kas despues di a haña atenshon médiko na e departamento di emergensia.

Un kantidat di 13 persona a aksidentá ku nan vehíkulo, miéntras 1 persona a aksidentá ku  bròmer.

E bosero a sigui splika ku den e periodo en kuestion, un persona a registrá su mes  na poli ku herida di bala, un persona ku a keda hinká, i 4 kaso di maltrato.

Mas aleu el a duna di konos’é ku tur aña ta e mesun kantidat di e tipo di insidentenan aki ta keda registrá na poli den fin di aña, pero por tuma nota ku e kantidat di kasonan di vürwèrk i aksidente durante e periodo en kuestion ta bahando drástikamente, di kual esaki sigur ta un bon notisia.

Pa finalisá  e bosero di Sehos a relatá ku e aña aki a bai hopi trankil kompará ku añanan anterior.