WILLEMSTAD.- Minister di Desaroyo Sosial, Labor i Bienestar Hensley Koeiman ayera durante konferensia di prensa di Gobièrnu di Kòrsou a splika ku e ayudo ku gobièrnu na e momentu aki ta dunando den kuadro di krísis di Vírus di Corona ta konsistí di 3 komponente. Esakinan ta sosten efektivo, pakete di kuminda i karchi pa komestibel. Minister Koeiman a informá ku un total di 6165 persona a apliká via e wèpsait di gobièrnu pa sosten.
E kantidat di hende ku a pèrdè trabou despues di 15 di mart 2020 i a hasi un aplikashon ta 4.345. E kantidat di hende ku a pèrdè trabou promé ku 15 di mart 2020 i a hasi un aplikashon ta 1820. Ku ta den total 6165.
Koeiman tambe a duna sifranan tokante e gastunan di su ministerio durante periodo di krísis di Corona. A duna sosten laboral den forma efektivo na 1760 persona desempleá pa un montante di 5.492.137,- Naf. A duna karchi pa komestibel pa 2904 persona desempleá pa un montante di 2.096.250,- Naf. A duna karchi pa komestibel pa 7488 kobradó di ònderstant pa un total di 5.483.731,- Naf. Tambe a duna paketenan di higiena pa 7182 kobradó di ònderstant pa un montante total di 700.000,- Naf.
Tambe Koeiman a bisa ku e portal di sosten laboral di SOAW den periodo di COVID-19 a habri bèk. Esaki ta pa sosten na personanan ku a pèrdè trabou i pa karchi sosial. Portal a habri djamars 1e di sèptèmber 2020 te ku djamars 15 di sèptèmber pa 8 or di anochi. Koeiman a bisa ku pa mas informashon òf pa aplikashon nobo por bishitá www.fondodisosten.org.

E dianan di depósito i rekargo ta e siguiente.

Djabièrnè 4 di sèptèmber 2020:
-Sosten laboral finansiero;
-Sosten laboral den forma di karchi sosial.

Djabièrnè 11 di sèptèmber 2020:
-Rekargo di karchi sosial pa personanan ku ta risibí ònderstant.