WILLEMSTAD.- Viva Construction Company ku Ryan Neuman komo propietario pa algun aña kaba a hasi un investigashon relashoná ku e preservashon di e aktual Hotel Plaza, ku a keda konstruí na 1955. Ryan tin un eksperensia amplio den mundu di konstrukshon na Kòrsou den vários proyekto. Pa tal motibu el a atkerí hopi konosementu den materia di konstrukshon i a establesé relashonnan pa por logra un kompra responsabel di material i servisio.

Teniendo na kuenta e estado aktual di Hotel Plaza tantu pa loke ta e dimenshon di kambernan, a resultá ku e preservashon di e hotèl aktualmente no ta faktibel i bash’e abou ta e úniko opshon.

Ta ampliamente konosí ku e estado di mantenshon ta hopi malu i tin yen pida pida di betòn ku a kibra. Henter e interior di e hotèl a basha aden. A kita tur e pipanan di koper. Porta i bentananan ta destruí. E mobilario ku anteriormente a ofresé 647 mil florin pe den un findishi, ya no tei mas òf ta kompletamente destruí.

E kambernan aktual ta demasiado chikí pa sirbi komo un hotèl di 4 strea. Ryan Neuman ta sigui splika ku promé ku esei nan tabata den kontakto ku vários kadena di hotèl, inkluyendo Hilton.  Un ke otro tin di aber ku e preis di kamber di un hotèl di 3 strea i e kapital ku tin di invertí den dje.

Ryan Neuman i otro ekspertonan a yega na e konklushon ku basha abou t’e úniko opshon. E bashamentu abou no ta fásil i esaki debí na su ubikashon kantu di laman, kual mester sosodé ku hopi prekoushon. Esaki ta hasi ku e bashamentu abou lo ta relativamente karu. E kantidat di ophetivo ta di 3 mion di florin.

Apesar di tur difikultat manera menshoná anteriormente, Viva Construction a kontribuí i ta drùk besig ku desaroyo di plannan pa despues di basha abou por konstruí apartamentunan pa hasi mas grandi e bibamentu den siudat.

Den e kuadro aki Viva Construction ta okupá ku mas partido, entre nan gobièrnu, invershonistanan lokal i ekstranhero, fondo di kuido pa monumentonan i Carmabi pa esaki.