WILLEMSTAD.- Ultimamente por mira bastante vehíkulo ku plachinan di number largu den forma horizontal ta kore rònt riba nos isla.
Anteriormente Ministerio Públiko a saka un komunikado kaminda nan ta duna di konos’é, ku esaki ta kompletamente kontra di lei.
Den un kombersashon ku EXTRA a sostené ku bosero di kuerpo polisial Imro Zwerwer, el a duna di konosé ku e úniko plachi number legal ta esun ku servisio di impuesto “Ontvanger” ta duna.
Segun Zwerwer, e plachi di number ilegal tin un but mará na dje, pero debí ku e konsentrashon aworakí ta kompletamente riba e parti di “Toque de Queda” i tambe reglanan ku e komunidat tin ku tene nan mes na dje relashoná ku COVID-19, entre otro aglomerashon, e kapasidat di personal pa bai konsentrá i kontrolá e tipo di plachinan di number ilegal ta wanta un ratu.
Pero esaki no ta nifiká ku Kuerpo Polisial no tin atenshon pa e fenómeno aki ku dia pa dia ta oumentando.
P’esei ta bon pa outomobilistanan tene bon na kuenta, ku pronto Ministerio Públiko i Kuerpo Polisial por bai aktua kontra tur outomobilista ku tin e plachinan di number ilegal.