WILLEMSTAD.- Universidat di Kòrsou (UoC) ta konstatá ku alumnonan ku kaba un estudio na nivel di SBO na Kòrsou no ta sufisientemente ekipá pa por drenta i sigui un estudio profeshonal di nivel mas haltu. Ta ripará esaki tantu den enseñansa tékniko komo otro profilnan di estudio.

Meskos ku universidat ta boga pa drecha e link entre enseñansa primario, sekundario, drecha kontenido i dekolonisá enseñansa, ta boga pa restablesé un mihó konekshon den e kolòm di  enseñansa profeshonal (LBO-MBO-HBO).

Na e universidat konforme lei a habri un fakultat pa komportashon siensia sosial. Meta prinsipal ta pa forma siudadanonan den otro arianan ku no ta esunnan tradishonal ku UoC ta ofresé manera lei, teknologia i atministrashon finansiero.

Rector Magnificus, Francis De Lanoy ta bisa ku apesar ku UoC ta di akuerdo ku tin un nesesidat pa e tipo di programanan aki nunka e universidat a risibí e fondonan nesesario di parti gobièrnu pa amplia e loke ta ofresé na estudio.

Banda di esaki ta konstatá ku studiantenan ku a kaba un estudio na nivel di SBO i ku ta esnan ku ta drenta e programa aki pa bira trahadó sosial tin nan defisiensianan. “E diferensia entre e diferente skolnan SBO na Kòrsou ta enorme”, De Lanoy ta bisa.

Esaki ta pone ku UoC tin gastu èkstra pa remediá e loke ku e studiante falta. Esaki alabes ta hasi e kosto di e estudio haltu miéntras ku e output ta bira ménos.

“Tur alumno ku finalisá un estudio SBO nivel 4 por drenta UoC, pero e studiantenan mester di hopi atenshon pasobra nan no tin e nivel deseá pa enseñansa superior, e rector magnificus ta splika. UoC ta ofresé vários kurso adishonal pa dil ku e defisiensianan di e alumnonan, pero e falta di sufisiente fondo ta forma un difikultat.”

De Lanoy ta suprayá ku alumnonan ku finalisá un enseñansa profeshonal sekundario (“secundair beroepsonderwijs”) mester por drenta enseñansa profeshonal haltu (“hoger beroepsonderwijs”) sin problema. “Pues e formashon profeshonal mester tuma lugá na nivel di SBO pa ora nan sigui un estudio na nivel di HBO bira un spesialista.”

E rector magnificus ta konstatá e mesun problema den estudionan tékniko. E kambionan fundamental ku a hasi na skol tékniko MTS na su opinion no tin efektonan positivo. UoC ta ripará ku fluho natural di studiante di MTS ku ta drenta fakultat tékniko na universidat a stòp. “E amor i pashon pa enseñansa tékniko a bai pèrdí na Kòrsou.”

Na opinion di De Lanoy si no hasi e kambionan nesesario pa sòru pa un mihó konekshon entre e diferente nivelnan di enseñansa den e kolòm tékniko Kòrsou ta pèrdè e boto. UoC di su banda ta purba di pusha di ariba bai abou pa for di nivel di LBO kuminsá hasi kambio.

“Ku tur e kambionan teknológiko di inteligensia artifisial i maneho di data mester bai den e direkshon aki. Awendia e hende mester tin formashon amplio pasobra tur kos ta konektá ku otro. UoC ke tuma liderato den formashon práktiko tékniko, pero mester di fondo pa hasi esaki.”