WILLEMSTAD.- E pandemia di COVID a trese hopi doló, pero tambe el a trese desaroyonan positivo. Un di nan sigur ta e programa pre akadémiko ku University òf Curaçao a kuminsá kuné i kaminda ta kapasitá e hóben studiante, dun'é e entrenamentu nesesario pa ora e bai sigui studia den eksterior e ta mihó prepará.

Rector Magnicifus di UoC dr Francis de Lanoy a bisa den entrevista ku EXTRA ku pa straño ku ta parse ounke hopi hóben no por a bai sigui nan estudio den eksterior na 2020, tòg nan no a haña mas studiante aserka. El a bisa ku e kantidat di aña pasá ta meskos ku e otro aña.

Loke si UoC a hasi ta desaroyá un programa pre akadémiko, Upap (University òf Curaçao Pre Academic Programme). E programa aki ta traha riba e gep grandi entre e studiante ku a kaba enseñansa sekundario pa enseñansa akadémiko. Pa kambia for di alumno pa bira studiante ta un gèp hopi grandi. I hopi bia ta balotá e kambio ei.

https://youtu.be/lO9t6GtBvbo

Banda di esei ta bin aserka e shòk kultural ku e hóben ku a kaba skol sekundario ta haña, ku ta inkreibel. E hóben na Kòrsou a kustumbrá ku mama, tanchi bisiña pero ora e bai afó i pa kolmo den temporada di COVID, e ta sera den un kamber di 3.5 pa 3.5, na un haltura di 7 tin bia 11 piso, nunka a haña enseñansa akademia; aki tabata den klas ku 30 alumno i na Hulanda un sala ku mas di mil studiante. E hóben aki ta kai den isolashon.

Tur e kosnan ei segun dr de Lanoy a pone ku nan a traha e programa pre akadémiko, ku a ofresé na esnan ku a disidí na último ora pa keda Kòrsou. E studiante ku e pasa e programa aki awor ta bon ekipá

Realmente, pa bai unda ku e ku, rònt mundu.

“Tin lo bisa ku e opleiding ku nan ta bai hasi ta 4 aña i ku e programa pre akadémiko aserka ta bira 5 aña, pero ta lubidá ku e ‘rate’ di éksito ta muchu mas haltu, pasobra bo ta mas kapasitá pa hasi e  kos ei. E transferensia for di un alumno pa un studiante ta algu inkreibel. E kos ta grandísimo”, dr de Lanoy a splika.

Un mucha ku a sali for di un ambiente protehá, kaminda  ta un ambiente sera, ta bai un siudat akadémiko, kaminda pa move di un punta a otro ta mei ora, e ta drenta un kultura ku e no konosé, e mes tin di kushina, dosente ta papia idioma ku no ta di dje i e manera di duna lès ta kompletamente otro, ta algu inkreibel grandi. Na Kòrsou nos no ta kritiko sufisiente pa bisa kiko resultado di nos studiantenan ku ta bai afó ta. “Mi no ta bisa ku nan no tin di bai afó, pero e studiante mester ta bon prepará prinsipalmente ku e situashon di COVID aki. I nan di UoC a base di eksperensia ta mira ku studiantenan ku hasi nan bachelor serka nos, nan master na Hulanda òf Merka, ta pasa esei fásil. Esei pasobra e ta fundeshi sólido i e transferensia di alumno pa studiante a tuma lugá di forma ku e por a dil kuné”, segun rector.

UoC ta hañando reakshonnan masha positivo di studiantenan ku a pasa den e programa. Tin un grupo ku a bai sigui nan estudio na yanüari i nan ta kontentu, nan ta mas kómodo i para riba nan pia i dil ku e desafionan den komunidat. I p'esei UoC ta informando na enseñansa sekundario pa laga e yu prepará serka nan  pasobra e no ta pèrdè pero ta gana.