Willemstad. - Durante e periodo di Siman Santu polis a sigui ku kòntròlnan dirigí i general na diferente sitio riba nos isla. Djaweps i djabièrnè respektivamente 29 i 30 mart 2018 a kontrolá na e parti:

Kontròlnan Pariba di Kòrsou a produsí 20 prosèsverbal pa e siguiente

infrakshonnan:

manehá un vehíkulo sin faha di seguridat 5

manehá un vehíkulo sin reibeweis bálido 5

manehá un vehíkulo sin karchi di kùr 1

manehá un vehíkulo sin seguro bálido 3

manehá un vehíkulo sin number di outo pagá 5

Papia na telefòn selular 1

Durante di e kontròl aki polis a konfiská un arma di kandela i a detené tres hòmber sospechoso pa posishon di arma di kandela.

Na e playa di Caracasbaai un señora pa un motibu ku te na e momento aki ta deskonosí, a guli hopi awa durante ku e tabata landa. A saké for di awa i ambulans a dun’é promé asistensia pa despues transport’é pa Poliklínika de SEHOS.

Durante di patruyahe a pone hopi atenshon na e parti preventivo tambe.

Kontròlnan parti pabou di Kòrsou a parti un total di 56 prosèsverbal pa e siguiente

infrakshonnan:

manehá un vehíkulo sin faha di seguridat 6

manehá un vehíkulo sin reibeweis bálido 9

manehá un vehíkulo ku un reibeweis ku no por lesa 1

manehá un vehíkulo sin seguro bálido 5

manehá un vehíkulo sin karchi di kùr 4

manehá un vehíkulo sin number di outo pagá 17

manehá un vehíkulo sin number di outo pegá dilanti 11

manehá un vehíkulo sin number di outo pegá patras 1

manehá un vehíkulo ku glas skur dilanti 1

manehá un vehíkulo sin ku e lusnan di brek ta funshoná 1

Durante di e kòntròl aki a pone atenshon riba (mal)uzo di alkohòl. Personal di

Marechaussee a laga diferente shofùr supla den e aparato di kòntròl. A haña indikashon ku kuater shofùr tabata bou di influensia di alkohòl. Despues di un investigashon mas profundo a resultá ku nan no a surpasá loke ta pèrmití.

Personal di Ministerio Públiko tambe tabata presente i a kobra personanan ku ta debe but. A topa 45 persona ku debe but i a logra kobra 30 di e personanan aki i e 15 otronan a yega na un akuerdo.

Alrededor di 12.00 polis a detené un hòmber sospechoso R.B. den área di Westpunt. Tabatin un òrdu di detenshon di fiskal di Ministerio Públiko. E ta sospechá di a kometé ladronisia.

Na altura di Parke Himno i Bandera tabatin un dalmentu ku herido. Shofùr di un outo a pèrdè kòntròl i a bai dal den un palu di lus. E Shofùr tabata keha di doló na su lomba i den su pechu. Ambulans a transportá e víktima pa Poliklínika pa tratamentu médiko.

Kuerpo Polisial por lo general ta satisfecho ku komportashon di públiko te na e momento aki.