WILLEMSTAD.- Na e momentunan aki lider sindikal di BTG ta anunsiando na trahadónan di Selikor kiko ta e akuerdo ku a logra ku gobièrnu i gerensia di Selikor. Una bes ku a logra akuerdo lo pidi e trahadónan pa reanudá trabou.

Manera EXTRA a informá den oranan mas tempran e trahadónan di Selikor tabata bastante rabia i disgustá pa e echo ku gobièrnu a kòrta 5% di e plaka ku e kompania mester haña tur aña, i esaki e sindikato i su miembronan a yega na e konklushon ku lo por yega na pèrdida di kupo di trabou. Despues di un dia largu di basta negosiashon entre minister Zita Jesus-Leito ku ta representá minister Camelia-Romer i tambe gerensia di Selikor finalmente a yega na un akuerdo.

Mester bisa ku den oranan di mèrdia a parse ku a yega na algu pero ora ku e dirigente sindikal a presentá esaki na su miembronan nan a rechasá mayoria di e punto poniendo ku e dirigentenan sindikal mester a bai bek mesa di negosiashon.

Entre e puntonan ku tabata na diskushon tin e desishon di Konseho di Minister di 2016, den kua a indiká ku Selikor ta e úniko kompania ku ta hasi trabounan di riolering pa DOW. Trabounan di riolering pa DOW lo keda konkretisá den un akuerdo. Tin pendiente pago na balor di 3.7 mion y trahadónan a eksigí ku ta traspasá e plaka di ministerio di finansa pa Selikor. Ta trata e periodo 2015-2017.

Ministerio di VVRP a firma e dokumentu pa aprobá ku minister di finansa ta paga. Na promé lugá a eksigí ku minister ta aseptá ku ta Selikor so ta hasi trabounan di riolering pa DOW. Mas detaye den edishon di EXTRA.