WILLEMSTAD.-Direktor general di Aqualectra Darick Jonis a duna prensa di Kòrsou un bista kon e situashon di koriente ta te na e momentunan aki. Awe mainta koriente a bai atrobe pero a resultá ku ta trata di un situashon di koriente ku a bai tur kaminda.

Jonis a splika ku ta for di mei mei di yanüari 2020 a kuminsá haña inkonsistensia den suministro di koriente. El a splika ku e problema ku a surgi no ta unu di falta di kapasidat pero vòltahe ku a kuminsá fluktua. Esei a pone ku e sistema mes ta kita klientenan for di e ret. Téknikonan di Aqualectra ta analisando e situashon pa asina por haña sa ta kiko ta pasando. Ta frakshon di sekònde ta determiná masha hopi den suministro di koriente. Ayera tardi kaba a nota sierto desaroyonan i a kuminsá traha riba dje pa e no ripití, pero awe mainta a surgi otro tipo di problema ku nan no a konta riba dje. Aqualectra a buska ekspertonan for di eksterior pa yuda solushoná e problema.

Aqualectra a nota ku tin hopi bientu, e mulinanan di bientu a kai afo i esei ta nifiká ku alrededor di 40% di suministro a kai afo.

16 di novèmber 2019 tabata e último kaso di ‘blackout’ ku Korsou a konosé. Jonis a enfatisá ku loke a pasa awe ta diferente for di e kaso di 16 di novèmber 2019. E direktor ta spera ku pa awe tardi pa mas o ménos 4or e problemanan lo ta solushoná. Den mesun rosea el a indiká ku e problema di koriente no tin nada di haber ku Curoil ni CRU. Asina tin mas detaye EXTRA lo suministrá eseinan.