Update: WILLEMSTAD - Den kareda di 03:35 mardugá, Servisio Meteorológiko Kòrsou, a emiti un boletin final ku ta indika ku  e vigilansia pa mal tempu a ser kanselá.  Imágen di satelit i radar ta indiká ku e área di mal tempu ya no ta forma menasa mas pa Kòrsou.

Boletin #1

WILLEMSTAD - Djasabra 18 di novèmber pa 01:55, Servisio meteorológiko Kòrsou a emití un vigilansia (kódigo oraño) pa mal tempu pa Kòrsou. Segun e boletin, imágen di satelit i di radar ta mustra un área di mal tempu ku por ta un menasá pa sierto parti di Kòrsou. E kondishonnan aki lo dura for di djasabra, 18 di novèmber 2017, 2’or mardugá te djasabra, 18 di novèmber 2017, 4’or di mardugá.

E impakto antisipá ta, áwaseru fuerte ku por kousa inundashon i/òf derumbe di tera i baranka na sierto parti di nos isla; ráfaga di bientu por kousa lokalmente sierto destrukshon riba su ruta; welek por kai i kousa daño na aparatonan i otro opheto.

P’esei ta bon pa tuma medida di prekoushon:

Saka stèker di aparatonan elektróniko afó i no hasi uso di esakinan durante di un evento di welek ku bos;

Usa telefòn ku waya solamente den kaso di emergensia;

Mara ophetonan ku ta lòs pafó i pone bo mes i bo bestianan di kas den seguridat;

No usa palunan aislá pa skonde;

No pasa dor di kayanan òf áreanan ku ta inundá, òf kaminda ku tin roi grandi ta kuri;

Sali for di boto i alehá bo mes for di awa, si esei ta posibel;

Un Vigilansia pa Mal Tempu ta un anunsio pa ora ku mal tempu ta posibel (probabilidat di 30 pa 50%) denter di próksimo 3 pa 12 oranan.

E boletin ta terminá pa keda pendiente pa mas informashon.

E siguiente boletin lo wòrdu emití djasabra, 18 di novèmber 2017, 4’or di mardugá.