Update: Ministernan Zita Jesus-Leito (VVRP) i Giselle Mc William (MEO) huntu ku direktor di CPA i otro funshonarionan di haf a duna informashon na komunidat despues ku un kran a dal den brùg Juliana awe mainta na momentu ku e barku Wish Way tabata drentando haf ku e krannan nobo pa CPS. Direktor di CPA Humberto de Castro a mustra apresio i a duna rekonosementu na tur e lotsnan i otro personal ku bou di direkshon di kapitan di haf ta guia mas ku 3000 barku tur aña drenta nos haf sin muchu insidente.

Minister Mc William a bisa ku no opstante e insidente, hopi hende a presensia e entrada di e barku. E tipo di trabounan aki tin rísiko, pero tene e enfoke riba e parti positivo esta ku awor Korsou ta bai tin krannan nobo loke mester trese na efisiensia den haf i duna adelanto na ekonomia.

Minister Zita Jesus-Leito di su banda a bisa ku ta bai hasi investigashon, pero no tin daño grandi na e brùg. No tin motibu di prekupashon. Mas detaye den edishon di EXTRA.

Update: Minister Mc William atendiendo aksidente den haf

Minister Giselle Mc William a tuma nota di e aksidente den haf awe mainta kaminda un kran ku tabata riba e barku Wish Way a dal kontra di brùg Juliana. Mesora ta den kontakto ku direktor di Curacao Port Authority (CPA). E minister a informá ku nan ta kompilando tur informashon i lo tene un enkuentro ku prensa pa duna informashon korekto i tambe kiko lo pasa despues. Keda pendiente pa mas detaye.

Barku Wish Way a drenta haf awe ku dos kran pa CPS

WILLEMSTAD.-Un públiko basta grandi a bai den área di haf pa mira e barku Wish Way drenta haf ku dos kran pa e kompania Curaçao Ports Authority (CPS). Despues di alrededor di 40 aña ta remplasá krannan nobo na CPS sperando pa brinda mihó servisio i sigur mas rápido pa komersiantenan por haña nan karga.

E parti dilanti di e barku a pasa bou di brùg pero na momentu ku a yega pa pasa e prome kran esei si no a logra pasa sin problema. E punta di e prome kran a dal den e brùg, por mira kon un lus ku tabata sende paga a kibra. E di dos kran si a logra pasa sin problema, despues ku esnan enkargá a logra maniobra ku e barku un poko mas na banda di Punda pa asina krea espasio na e banda di Otrobanda. Tin daño na e brùg i na e kran.