WILLEMSTAD.-E persona morto den Saliña djaweps mainta tempran no ta trata un morto kriminal, esei bosero polisial a konfirmá pa EXTRA. Djaweps mainta a surgi un situashon di tristesa i preokupashon na momentu ku a topa ku un persona drumi abou den Saliña, na altura di Auto City, i no ta duna señal di bida mas. Polisnan ku a yega na e sitio a sera tur e área pa hasi investigashon. Dòkter di polis ku a presentá a konstatá morto, sin embargo e situashon no tabata muchu kla kiko lo por a pasa.

Saliña no tin muchu bon nòmber i hopi lihé spekulashonnan a kuminsá si akaso ta trata di kaso di krímen. Un ratu pasá bosero polisial Imro Zwerwer a konfirmá pa EXTRA ku ta trata di un morto natural. Pas na su alma i forsa na e famia pa karga ku e pèrdida.