WILLEMSTAD.-Manera EXTRA a informa mas tempran, Ministerio Publiko no ta bai persiguí Maduro & Curiel’s Bank (MCB) relashoná ku e kaso konosí komo swaip pa dòler. Ta trata un kaso ku a tuma lugá 10 aña pasa i awor OM a duna klaridat riba resultado di nan investigashon.

EXTRA a aserka MCB pa un komentario relashoná ku e desishon di OM. MCB den un reakshon konsiso ta indiká ku manera e komunikado di OM tambe ta bisa, lo no bai persiguí MCB mas pa e kaso bieu di ‘swaipmentu’ di mas ku 10 aña pasá. MCB lo renunsiá e entrada di Naf. 25 mion pa e periodo enkuestion.

Ademas, banko a fortifiká nan maneho di Compliance pa por kumpli mihó ku nan papel komo ‘gatekeeper’ den e sistema finansiero. For di aña 2012 MCB a tuma medida kontra swaipmentu di tarheta i a distansiá nan mes for di e práktika aki. OM ta splika esaki tambe klaramente den nan informe. Pues ku e desishon aki di OM e kaso a finalisá i a sera.