WILLEMSTAD. - Den nan boletin di tempu emití 5’or di djadumingu 14 di òktober atardi Servisio Meteorológiko ta indiká ku Kódigo Hel ta sigui vigente te ku djaluna atardi 6’or. Pues prekoushon pa mal tempu ta sigui vigente pa awe djadumingu.

E boletin ta indiká ku  shelu lo keda por lo general hopi nublá i prinsipalmente mas lat awe, awa por kai ainda riba parti di Kòrsou. Bos tambe lo zona de bes en kuando na algun kaminda. Durante mayan djaluna un wer seku lo prevalesé, miéntras e fluho di bientu ta bira un tiki mas fuerte.

Temperatura máksimo lo alkansá 30 ºC i temperatura mínimo 25 ºC.

Bientu lo supla for di un direkshon generalmente ost i moderá; forsa 3 te 4 (12 te 30 km/ora, 7 te 16 nudo). Espesialmente den áwaseru, de bes en kuando basta fuerte den ráfaga: forsa 5 (31 te 39 km/ora, 17 te 21 nudo). Gradualmente bientu lo bira un poko mas fuerte.

Pa loke ta trata e situashon general, t’asina ku durante e próksimo 24 ora ta antisipá ku e situashon di tempu gradualmente lo bai mehorá den nos área. Sinembargo, mas lat den awe anochi ta antisipá algun áwaseru un bes mas ku un posibilidat leve pa welek i bos. Pa e motibu aki, ketu bai tin un Prekoushon pa Mal Tempu (Kódigo Hel) na vigor. Sigun e sistema aki ta alehá su mes, e posibilidat pa awa kai lo mengua i na mes momento e bientu ta bai oumentá.

Kondishon di laman lo ta trankil i gradualmente moderá ku altura di ola entre di 0.5 i 1.5 meter (2 te 5 pia).  Djaluna e olanan lo ta un tiki mas altu.

Na e momentunan aki no tin ningun sistema signifikante di wer tropikal.

E boletin aki ta bálido te djaluna atardi 6:00 o.l, 15 di òktober 2018.