WILLEMSTAD.- Awe mainta alrededor di 07.48’or, Sentral di Polis a risibí notifikashon di un kaso di hinkamentu ku a tuma lugá den Mampurituweg.

Mesora a dirigí un unidat na e sitio i na su yegada riba e krusada Mampurituweg/ Kaya Juan A. Lesire, el a topa ku un hòmber drumi abou ku no tabata duna señal di bida.  Ambulans ku a presentá na e sitio no por a hasi nada mas pa e víktima. For di investigashon ku polis a realisá na e sitio a resultá ku tabatin un aksidente entre dos vehíkulo i despues di un konfrontashon ku a surgi entre shofùr di un di e outonan i un persona den e otro outo, un di nan a hinka e otro ku un opheto skèrpi na e parti ariba di su pechu robes i tambe den lomba.

Despues di su akto e sospechoso a bai for di  e sitio den e vehíkulo ku e tabata kore.  Alrededor di 09.00’or dòkter di polis a konstatá morto di e hòmber Roberto Jose Cathalina, nase na Colombia dia 25 di yüni 1982.

Riba òrdu di fiskal di Ministerio Públiko a konfiská e kurpa sin bida pa mas investigashon. Mas lat a bin enkontra e outo di e hòmber sospechoso den kaya Djogodó.

Investigashon den e kaso aki ta kontinuá.