WILLEMSTAD.- Awe ta apertura ofisial di Urban Venue den kurason di Skarloweg. Un sitio di dibershon i alabes di kondishon. Jos van Wordragen ta trahando riba e konsepto nobo aki pa basta luna kaba i awe nochi su soño ta bira realidat.

“Trese hende huntu i usa deporte pa krea un mihó ambiente salú na Kòrsou”, esaki ta e lema tras di kual URBAN Venue ta para pe. Jos a splika ku e konsepto aki ta Urban Gym, un konsepto ku a bin di kaya. Nan a kuminsá riba kaya ku un grupo di hoben riba un plenchi. Trein i trein i for di e sentimentu ei nan a bin ku e Venue nobo aki, ku mas seriedat, nan a bai sigui lèsnan pafó i ku e konsepto di famia, amigunan, músika di urban nan a tres e huntu den Skarlo.

Awe djabièrnè.....

Awe djabièrnè ta e apertura ofisial. E gym lo keda habrí pa Roelly Winklaar i tambe minister Koeiman pa mitar di 8 anochi. I despues tin e evento di baile di urban. E lo bai kompañá ku un koreografia i tur hende presente lo partisipá. Lo inougurá e aparatonan Technogym, lo habri e baño i wc nan nobo, lo tin shou di akrobasia, un akto di basketbòl i hopi hopi mas. Henter e anochi segun Jos lo ta yená ku show. Tur loke rekoudá awe nochi lo ta destiná pa obranan di karidat. E programa di karidat di Urban ku lo kuminsá awe nochi kuné, lo hasi posibel deporte na Banda Bou pa muchanan.

Djasabra...

I mañan djasabra lo tin fiesta. Na e sitio kaminda Urban Venue ta situá tabatin ántes Tutu tango, Bermuda i awor e konsepto aki. Tur luna lo bai tin algu spesial einan huntu ku artistanan lokal. Pa mañan djasabra lo tin artistanan lokal i di Ulanda ku músika di Urban.

Gym...

Technogym ta ekiponan luhoso ku ta keda usá den gymnan luhoso. Tambe tin ekiponan di forsa pa esnan ku ta trein ku forsa. Esaki ta nifiká segun Jos ku tin un kombinashon di aparatonan di luho, training ku forsa, tin lèsnan den grupo, programa di baha peso. Ta un gym pa tur hende. Ta paga un suma pa luna i awor aki tin un spesial di 150 florin pa 3 luna ku plan di kuminda i plan di gym inkluí. Tambe lo tin guia ku ta kana rònt i duna guia na e bishitantenan. E ta habri for di 6 or di mainta te 9 or di anochi.

E gym ta paden i pafó. Kòrsou ta muchu bunita pa keda paden so, segun Jos a bisa nos.

Eksperensia diferente...

E konsepto di diskotèk, ta pa duna e hende un eksperensia diferente. Lo tin kuminda i bibida den tur e eventonan. Tur hende lo ta un wéspet spesial. E eksperensia urban, kombiná ku luho i kalidat. E deporte ta e base i banda di esei ta hasi fiesta. I p’esei for di djaluna tur hende por inskribí pa forma parti di Urban Venue.