Trùk di pan i restorant por deliberá djadumingu

WILLEMSTAD.- E medidanan pa establesimentunan tei pa yuda kuida nos komunidat. Ronny Cornelis di MEO ta enkurashá tur hende pa ban bèk na e promé temporada di lock down i yuda kuida otro. Tin lus na horizonte i pesei ban sigui perseverá.

Un bia mas a korda tur supermerkado, minimarket i otro establesimentunan ku nan mester pone hand sanitizer na porta pa klientenan desinfektá man. Tambe mester limpia garoshi i makutu kada bia di nobo promé ku otro hende hasi uso di dje. Ademas mester marka strepi abou pa yuda hende tene distansia, spesialmente na kaha unda por haña aglomerashon di hende. E uso di tapaboka mester bira algu struktural.

Mas aleu Cornelis a duna di konosé ku trùk di pan por habri di 2’or pa 6’or atardi. Supermerkado i tur otro establesimentu mester sera pa 6’or atardi. Restorant i trùk di pan por ofresé delivery i asina ta evitá ku hendenan ta sali nan kas. Riba djadumingu esnan ku tin e pèrmit nesesario por hasi entrega di kuminda na klientenan.