E ta eksigí pa presidente CASHA  ‘step down’

WILLEMSTAD.-E asosiashon di akomodashonnan chikitu CASHA ta malinformá opinion publiko pasobra Corendon tin solamente 7% di e totalidat di kambernan di hotèl na Kòrsou i no 20% manera CASHA ta pretendé. Ademas Corendon su buelonan ta pa remplasá e 110.000 stulnan ku KLM a saka for di e ruta entre Amsterdam i Kòrsou. Na palabra sr. Atilay Uslu propietario di e kadena Corendon den deklarashon pa EXTRA.

Den oranan tempran di mainta EXTRA a publiká komentario di CASHA den kua ta indiká ku Corendon tin 20% di kambernan di hotèl i ku kompra di e hotèl The Ritz kombiná ku e echo ku Corendon su avion ta trese klientenan pa nan kadena ta nifiká ku Corendon ta konsentrá poder den industria di turismo na Kòrsou i esei ta peligroso. Asta a indiká ku Corendon ku tantu poder asina lo por determiná kiko ta pasa den turismo na pago di salario i servisionan, ademas di por tin influensia riba gobièrnu i otronan. EXTRA a pidi Corendon pa un reakshon konsiderando e gravedat di e kaso.

E propietario Uslu a indiká ku el a invertí mas ku 200 mion dòler kaba na Kòrsou kumprando produktonan dekaí, drecha i remodelá i asta konstruí partinan nobo i asina ta krea trabou pa pueblo di Kòrsou. Sr. Uslu ta kere ku akomodashonnan chikitu mester kuminsá paga nan belastingnan, pasobra Corendon si ta kumpli ku pago di su belastingnan. ‘E presidente di CASHA mester baha”, asina Uslu a bisa di forma enfátiko.

Deklarashon amplio di e propietario Atilay Uslu den edishon di EXTRA.