WILLEMSTAD.- Djabièrnè último gobièrnu a anunsiá maneho nobo pa ku uso di tapaboka. Den e kaso aki a anunsiá eksepshon den uso di tapaboka na skolnan.

Uso di tapaboka adekuá, ta obligatorio pa tur alumno i persona for di 12 aña den institutonan di enseñansa i espasionan paden ku ta keda usá pa aktividatnan di enseñansa.

Riba e obligashon aki ta konta un eksepshon pa maestronan: na momentu di duna lès (ku eksepshon di lèsnan di práktika), i e eksepshon aki ta konta solamente te asina leu ku e maestro por mantené un distansia seif for di otronan.

Pa e alumno e eksepshon ta: durante lèsnan regular, miéntras e alumno ta sinta na su asiento fiho; durante lèsnan di deporte, drama i baile i durante tareanan ku ta hasi bistimentu di un tapaboka difísil pa motibu di e karakter di e aktividat.

Otro medida pa ku tapaboka ku a anunsiá ta e obligashon eksistente pa ku uso di un tapaboka adekuá den establesimentunan awor ta konta tambe pa menornan for di 12 aña. E ta konta pa tur establesimentu i hasta agensia funerario i establesimentunan di horeca.

Uso di tapaboka ta keda nesesario tambe den espasionan públiko pafó i kualke otro situashon, kaminda no ta posibel pa mantené sufisiente distansia físiko.