Numbernan ku ta kuminsá ku 4 mas afektá

WILLEMSTAD.-For di mainta tempran tin hopi preokupashon i asta malkontentu serio ku a yega mesa di redakshon di EXTRA. Prinsipalmente kompanianan ku no por komuniká debí ku telefòn fiho no ta funshonando. Direktor di UTS/FLOW Danny Macaya a konfirmá na EXTRA ku nan ta eksperensiando problema riba e ret di telekomunikashon. E direktor a pidi diskulpa pa e inkumbiniensia i splikando ku nan ta trahando duru riba e problema. Nan tin asistensia di téknikonan di eksterior pa yuda den esaki.

E direktor di UTS/FLOW a duna di konosé ku eksperensiando un interupshon riba e ret. Esaki ta debí na un fayo den e sentral di Steenrijk. E problema ta den e parti di transmishon i esaki ta afektando prinsipalmente tur e liñanan di telefòn fiho ku ta di e sentral di Steenrijk.

Ta trata di numbernan ku ta kuminsá ku 4. Tur number di telefòn ku ta kuminsá ku 4 ta konfrontando problema. E klientenan aki no por yama otro kliente ku tambe su number ta kuminsá ku 4. Un di dos konsekuensia di e problema aki a ku e konekshon di data ta keda afektá. Esaki no ta afektá internèt, pero si data. Un ehèmpel ta ku na negoshinan por bira difísil pa swaip na momentu di pago. Sigur serka klientenan ku tin liñanan mas grandi e problema ta sòru pa basta inkumbiniensia.

Macaya a bisa ku e problema tékniko aki no ta afektá telefòn selular ni internèt riba selular.  Téknikonan ta trahando riba e problema i ta spera di por keda kla hopi lihé.