WILLEMSTAD.-  Durante un Konferensia di Prensa ku a tuma lugá na inisio di e siman akí, Gobièrnu di Kòrsou a informá ku, entrante djadumingu 25 di aprel próksimo, vakunanan di Pfizer lo muda for di Marinebasis na Parera pa WTC. E mudansa aki ta nifiká pues, ku tur persona ku tin sita pa su di dos dósis di vakuna Pfizer entrante djadumingu awor, mester akudí na WTC pa risibí esaki riba e fecha i e orario risibí den mail.

Sitanan pa vakunashon di Pfizer na WTC tambe, ta sigui tuma lugá solamente entre 7:30 or di mainta pa 2 or di mèrdia. Fasilidat di ‘walk-in’ na e momentunan akí no ta posibel pa personanan ku mester asistí pa e di dos dósis di Pfizer.

Dia 26 di aprel próksimo ta marka nèt 3 siman ku e posibilidat di vakunashon a habri pa komunidat kompleto. Esaki ta nifiká, ku den e periodo benidero ta bai tin muchu mas tantu persona ku lo mester risibí nan di dos dósis di Pfizer. Lamentablemente e fasilidat na Marinebasis Parera lo no por karga ku e grupo grandi akí, lokual a kondusí ku e Tim di Bakunashon di Kòrsou a yega na e desishon di muda pa otro Sentro di Bakunashon ku lo por akapará vakunashon di gruponan mas grandi.

E fasilidat na Marinebasis Parera por lo tantu, ta keda aktivo solamente pa kaba di vakuná personal di e kuerpo di defensa kende tambe ta forma parti aktivo den nos komunidat.

E siman akí, tur persona ku tabatin un sita na Marinebasis Parera entrante djadumingu 25 di aprel, a risibí un mail ku ta kontené fecha i orario adaptá i tambe tur informashon tokante e mudansa pa WTC. Sentro di Bakunashon di WTC por akapará muchu mas tantu persona riba e mesun fecha i orario pues por a hala fechanan mas dilanti pa mayoria siudadano ku ya tabatin un fecha stipulá.

Tim di Bakunashon ta komprondé ku e mudansa i e kambio den fecha i orario di e sitanan por trese inkumbiniensia pa algun siudadano i ta pidi diskulpa si esaki ta e kaso. Gobièrnu di Kòrsou ta gradisí e kuerpo di defensa inmensamente pa nan kolaborashon i sosten ku nan a brinda den e trayekto di vakunashon na Kòrsou.