WILLEMSTAD.- Gobièrnu di Kòrsou a organisá un pènel ayera pa duna informashon riba vakunashon. Ku presensia di  inmunólogo dr Ashley Duits, médiko dr Jerry Semper i botikario sra. Lydia Regina a pone énfasis kon seif e vakuna kontra e vírus di COVID-19 ta. Un punto masha importante ku dr Semper a splika ta ku e vakuna ta traha antikurpa sin daña nada pero e vírus si ta daña algu.

Dr Semper a splika riba e Herd Immunity di 120 mil hende. Esaki ta nifiká ku ora 120 mil hende ku ta 85% di bo komunidat ta vakuná, e ora ei nos ta riba e bon kaminda. I ke yega einan promé ku e temporada di orkan ku ta luna di yüni.

Diferente pregunta e dòkternan a kontestá, entre otro si e vakuna ta daña  bo DNA. Esaki no ta kuadra ku bèrdat. Manera e dòkternan a bisa e MRNA di e vakuna ta bai den e parti di bo sèl kaminda e DNA no tei mes. Meskos ku huma no por bira kandela meskos ku e MRNA no ta bai den e DNA.

E vakuna no ta afektá pero alkontrario e ta traha antikurpa pa protehá e hende di e COVID-19. Dr Semper ta kere ku mas bien mester papia di kiko e vakuna ta indusí na dje. E ta indusí na inmunidat pa protehá e hende kontra e vírus maligno aki. Pa e vírus sobrebibí, e tin di drenta bo sèl, multipliká i su yunan ta sali i rementá e sèlnan. E vakuna di su parti ta traha antikurpa sin daña nada pero e vírus si ta daña algu.

Tampoko ta bèrdat ku e vakuna ta stroba hende di sali na estado, segun e dòkternan den e pènel a splika.

E vakuna no ta stroba pa sali na estado. E kurpa humano ta e mashin di resiklahe di mas perfekto den tur kos. Ta e kurpa ta resiklá kos manera e so por. Tin diferente sorto di salu den e kurpa, e ta resiklá i us’e i e otro ta sali neutralisá dor di bo igra i sali den bo urina. E vakuna mester di algun ora pa hasi su trabou, e vakuna no tin efekto riba e sistema reproduktivo.