WILLEMSTAD.- Sekretario general di e ministerio di Desaroyo Sosial, Labor i Bienestar (SOAW), Etienne van der Horst, djaweps último durante konferensia di prensa a duna splikashon tokante e traspaso di e programa di alimentashon di Krus Kòrá pa ku SOAW. Den su splikashon el a enfatisá ‘ku no ta Krus Kòrá so, pero gobièrnu di Kòrsou mes tambe tin su programa di alimentashon’.
Minister Hensley Koeiman di SOAW huntu ku Van der Horst, a duna konferensia di prensa di gobièrnu tokante ‘Trayekto sosten sosial, transishon Krus Kòrá i registrashon den bario’.
Durante di e konferensia Van der Horst a splika ku na mart 2020 Kòrsou a konosé su promé ‘lockdown’. I ya na aprel 2020 gobièrnu a inisiá un programa pa duna ayudo di alimentashon ku partnernan stratégiko, manera Voedselbank. Pero tambe C-Post ku a distribuí e paketenan.
‘Den luna di mei 2020 nos a añadí un produkto adishonal, ku ta e karchi sosial kaminda hende por kumpra komestibel den kolaborashon ku 16 supermerkado lokal. Na yüni 2020 Krus Kòrá a inisiá e trayekto di ‘e-voucher’ (karchi elektróniko) pa kompra di komestibel, pakete di kuminda i kuminda kayente ku sosten di fondonan di gobièrnu hulandes.’
E aña aki den luna di mei gobièrnunan di Kòrsou i Hulanda a firma un protokòl ku ta regulá e manera ku e transishon di e programa di ayudo di alimentashon di Krus Kòrá pa e ministerio di SOAW lo tuma lugá. Gobièrnu di Kòrsou a firma e protokòl pa tuma over e proyekto di Krus Kòrá, pa motibu ku e organisashon a duna di konosé na Hulanda ku nan ke terminá ku e servisio aki. No solamente na Kòrsou, pero na Aruba i St. Maarten tambe. Van der Horst: ‘E ora ei gobièrnu di Hulanda a palabrá ku gobièrnu di Kòrsou, den landspakket. Ku gobièrnu lo tuma over e programa di alimentashon di Krus Kòrá.’
Van der Horst a splika ku 1e di mei 2021 ofisialmente a start e trayekto pa ayudo di alimentashon ku fondonan hulandes. Dia 3 di mei a kuminsá ku registrashon di residente via sistema digital riba e wèpsait www.soaw.cw. ‘Di kon asina? Pasobra Krus Kòrá su maneho internashonal ta ku e no ta kompartí su “database” ku nòmber di hendenan ku otro instansianan. No ta un kos di Krus Kòrá di Kòrsou, pero internashonalmente nan no ta hasié pa motibu di protekshon di hendenan ei.’
Pa e motibu ei ministerio di SOAW a kuminsá ku un proseso di registrá i apliká via wèpsait i via numbernan di telefòn.