‘Asta un siegu por mira esaki’

WILLEMSTAD.- Kòrsou ta pasando den un situashon ekstraordinario. Aworakí ta partido MFK ku su 9 asientonan ta goberná manera ta un diktadura tin. Ta ministernan di partido MFK so ta sintá den reunion di Konseho di Minister i ta manehá tur 9 kartera, pero no ta informá pueblo ki desishon a tuma.

Asina konsehero sindikal, Wim Van Lamoen ta trese dilanti. Van Lamoen ta referí na e reunion di Konseho di Minister di djárason 28 di ougustus kaminda mester a tuma desishon, pero komunidat no ta tende nada di esakinan. “Por ehèmpel den sèptèmber gobièrnu mester entregá presupuesto 2025 na parlamento, pues desishon tin ku kai den Konseho di minister, pero no ta tende nada.”

Pa Van Lamoen demokrasia na Kòrsou ta na peliger. “E kos aki ta insolito. Asta un siegu por mira esaki.” E konsehero sindikal ta kere tambe ku den seno di gobièrnu a sinta i disidí kaba kon ta repartí sobra fondonan riba di e presupuesto pa 2024.

Den e kuadro aki Van Lamoen ta di opinion ku tur gremio den komunidat mester aktivá. “Ta insolito ku e situashon aki ta tumando lugá i parlamentarionan ta tuma nota ku tin un situashon no demokrátiko pero no ta yama reunion pa atendé ku e situashon aki.”

Mas aleu Van Lamoen ta opiná ku sindikatonan tambe mester pone preshon i evaluá si mester,  i si mester asta subi kaya. Esaki debí ku gobièrnu tin un debe na empleadonan públiko ku e mester paga.

Tambe tin e debe ku mester paga, Van Lamoen ta bisa. “Ki dia i kon ta paga e debe aki? Gobièrnu mester sinta ku sindikatonan pa atendé ku e debe ku e tin na ámtenarnan i sindikatonan mester bai Fort Amsterdam pa eksigí e pago di su miembronan.”

Mas aleu Van Lamoen ta indiká ku banda di e pago di debe gobièrnu a keda di introdusí tambe un struktura salarial nobo kaminda porfin ta paga e empleado públiko manera debe ser. Esaki ta otro desishon ku gobièrnu mester tuma ku no ta tende nada riba dje.

Penshonado

Finalmente Van Lamoen a hasi un apelashon riba penshonadonan tambe sali pa nan derechonan “Si penshonadonan por a mobilisá tras di un fata morgana manera FZOG, nan mester mobilisá pa nan haña indeksashon di nan penshun.”

E ta mustra ku te awe penshonadonan ta warda riba kontesta pa wak kiko nan ta haña. “Na 2014 gobièrnu a palabrá ku sindikatonan ta ku a hisa edat di penshun na 65 i ku gobièrnu ta paga indeksashon di penshun di e penshonado. No ta APC tin ku paga esaki. For di 2016 gobièrnu debe e penshonadonan i e mester kumpli. Gobièrnu ke skùif e kos aki den skochi di APC, pero penshonado mester bai kobra gobièrnu loke e debe nan.”

Foto:

...Wim van Lamoen...