DEN HAAG/W’STAD.- Apénas dos siman pasá gobièrnu di Hulanda a dekretá ku Hulandesnan ta liber ta biaha pa islanan ABC, loke a sòru pa un ‘rush’ bou di e grupo aki pa bin pasa fin di aña aki na Kòrsou. Pero awor for di e mesun mundu polítiko tin grupo i sugerensianan ta ser lansá pa dekretá Kòrsou komo un destino di kódigo oraño pa motibu vakashonistanan no ta atené nan mes na regla.

T’asina ku e miembro di Tweede Kamer Ronald van Raak ta deseá pa gobièrnu di Hulanda desrekomendá biahamentu pa Kòrsou ku e meta pa pasa fakansi. El a reakshoná asina a base di videonan ku ta pasando riba medionan sosial di Hulandesnan ku ta aki ku fakansi i ku ta den ambientenan festivo riba nos isla i ku no ta hasi ningun kaso dje reglanan di e.o. distansia sosial.

Segun van Raak, ta ineksplikabel kon un gabinete no ta desrekomendá pa bai e islanan Karibense aki unda tin relativamente tiki kasonan di infekshon, siendo ku último dianan na Kòrsou ta registrando un rekòr kantidat di kaso nobo di COVID-19. “Si nos palabrá ku ta mihó bo no bai den eksterior, anto bo no mester permití esaki”, segun van Raak.

E miembro di 2de Kamer ta hasi un apelashon serio riba su paisanonan ku ta selebrando fakansi na Kòrsou pa nan atené nan mes na regla. “Bo sa ku tin reglanan estrikto, tambe ora bo tin par di serbes den bo kurpa i tambe ora ta hopi plasentero, pero simplemente komportá bo. Lag’e nèk!”

Mas aleu e miembro kolega Paternotte a ekspresá su strañesa pa e echo ku personanan ku ta bai Kòrsou mester hasi tèst, pero tòg no ta eksigí esaki ni nan tin di bai karentena na nan regreso.

Segun e parlamentarionan, nan a komprondé ku di parti di gobièrnu di Aruba nan ta keda straño tambe ku e isla aki ketu bai tin kódigo oraño pa Hulandesnan no opstante un bahada den e kantidat di kasonan di infekshon, siendo ku ta mantené kódigo hel ketu bai pa Kòrsou.

T’asina ku e Ministerio di Salubridat Hulandes a duna di konosé ku e ta monitor e situashon na Kòrsou hopi djaserka.