PHILIPSBURG.- E variante Afrikano di COVID-19 ta na St. Maarten kaba, i unabes e ta den Karibe, lo no tarda mashá pa e bati na nos porta. E entidat di Collective Preventative Services (CPS) i e Tim di Maneho pa Vakuna (VMT) na St. Maarten a lansa un kampaña di vakunashon den kual nan meta ta pa alkansá un 85% dje poblashon komo vakuná pa fin di luna di yüli. Esei nos por a komprondé for di informashonnan di SMN. T’asina ku Minister di Salubridat Omar Ottley a hasi un yamada spesialmente riba imigrantenan indokumentá ku ta bibando na St. Maarten pa kuater luna òf mas, pa nan bai tuma nan vakuna sin ku esaki tin konsekuensia pa nan.

Ottley a sigurá ku e personanan indokumentá riba e isla lo no ser persiguí dor di Departamento di Imigrashon. Al kontrario, el a bisa ku personanan indokumentá riba e isla lo por presentá na kualke un dje sentronan di vakunashon ku nan pasport i prueba ku nan ta biba riba e isla manera p.e. un resibu di utilidat òf un kontrakt di hür di kas.

Riba e pregunta, si e Ministerionan di Salubridat i di Hustisia a yega na un konsenso pa loke ta persekushon di indokumentadonan, Minister Ottley a duna komo kontesta ku e dos ministernan a yega na un akuerdo, esei pa motibu ku ámbos partido ta komprondé i rekonosé e urgensia pa tur hende riba e isla ser vakuná.

Segun e minister, St. Maarten ta trahando duru pa alkansá 85% di su poblashon vakuná pa asina e por alkansá e loke ta yama “herd immunity” i konsekuentemente e isla lo por bai bèk na un bida normal. Mas aleu el a deklará ku tin hopi hende i negoshi a bin ta puntra pa ki dia lo permití pa nan habri nan portanan te ku 4 or di mardugá, i di otro banda tin otronan ku ta puntra si no ta reanudá aktividatnan karnavalesko.

Segun Ottley, mas lihé hendenan akudí na porta di Festival Village pa ser vakuná, mas lihé tambe lo por habri negoshinan atrobe i bai bèk na normal di akuerdo ku nan pèrmit.

Di otro banda e minister a atvertí si ku RIVM di Hulanda a konfirmá ku na St. Maarten tin diferente variante di e vírus di COVID-19. El a splika ku tin e variante di India, i e variante di New York na e parti hulandes dje isla, miéntras ku na e parti Franses a keda konfirmá ku a detektá e variante Afrikano.

Esei ta motibu tambe pa hasi un yamada riba tur hende riba e isla aki pa tene e prekoushonnan nesesario pa evitá di ser infektá. Segun e minister, aktualmente tin 23 kaso konfirmá di COVID-19 na St. Maarten, di kual 3 dje personanan ei ta hospitalisá.