UTRECHT.- Esaki ta sospechoso ku polisnan ta buskando relashoná ku e tiramentu den tram na Utrecht. Polis di Utrecht a duna e foto di e sospechoso pa asina por logra pone man riba dje mas lihé posibel. Ta trata di e hòmber Gökmen Tanis di 37 aña di edat.

Segun oranan ta pasa mas i mas outoridatnan ta yega na e konklushon ku debidamente ta trata di un atentado terorista loke a sosodé na Utrecht. Tanis a nase na Turkia, asina polis ta informá. Outoridatnan ta indiká ku e hòmber aki ta peligroso i p’esei ta pidi komunidat pa no buska kontakto ku e hòmber pero yama polis mesora òf komuniká via otro kanalnan.  

Alemania ta oumentá kontròl na frontera ku Ulanda

UTRECHT.-Polis aleman a oumentá e nivel di seguridat na e frontera ku Ulanda, buskando un persona ku posiblemente lo ta embolbí den e kaso di tiramentu ku a tuma lugá awe mainta na Utrecht. Segun outoridatnan aleman, ya kaba a pone mas polis di frontera disponibel pa atendé ku e situashon ku a surgi. Tin atenshon pa tur kareteranan prinsipal, pero tambe konekshonnan ku trein i otronan.

Den kolaborashon ku outoridatnan ulandes a logra haña deskripshon di un sospechoso den e kaso aki. For di Ulanda a drenta e informashon pa buska un outo Renault Clio kuater porta. Outoridatnan ta papia di un morto i vários persona herida.

Polisnan anti terorismo a bai un kompleho di apartamentu na Utrecht despues di e tiramentu den e tram. Polisnan ta kere ku tin un sospechoso ta skondiendo despues di e akto terorista.

Vários herido den tiramentu den tram na Utrecht

Polis ta kere ku lo por ta trata di atentado terorista

 UTRECHT.- Vários persona a resultá herida den un tiroteo ku a tuma lugá den un tram na Utrecht, Ulanda. E informashon aki a keda konfirmá pa outoridatnan.  A tiramentu a tuma lugá awe mainta 10;45 ora ulandes, na 24 Oktoberplein  na Utrecht.  Polis a será e área pa hasi investigashon pero te ainda no a logra hasi niun detenshon. Outoridatnan ta kere ku por ta trata di un akshon ku motivashon terorista. E último informashon ku EXTRA a risibí di Ulanda ta bisa ku posiblemente lo tin un morto den e kaso aki.

Den e bario Kanaleneiland na Utrecht i hinter Ulanda e kaso aki a kousa hopi konmoshon. No ta konosí kiko ta e motibu di e insidente aki. Segun informashonnan risibí, un hòmber pa motibunan deskonosí a kuminsá basha bala. E situashon a haña un atenshon asina grandi te ku premier Mark Rutte a kanselá su reunion di koalishon di tur djaluna pa asina tuma nota di loke por ta un atentado terorista na Ulanda. Ya kaba a pone grupo relativamente grandi di personal di ambulans pa duna asistensia den e área.

24 Oktoberplein ta un sentro hopi importante den tráfiko na Utrecht. Tin un stashon di tram einan. Pa awor aki niun tram mas no ta koriendo den e área ei, esaki segun agensia di notisia ulandes nu.nl.