WILLEMSTAD - VBC a tuma nota di e último resultadonan di Covid-19 na Kòrsou ku gobièrnu ta publiká i ta hopi preokupá ku e oumento dramátiko di kasonan aktivo. Komo representante di sektor empresarial VBC semper a boga pa tin un bon balanse entre e aspekto di salubridat públiko i e faktor ekonómiko. Ámbos ta hopi importante i mester pisa den e balanse. Ta p’esei tambe VBC semper a i ainda ta boga pa ampliá e tim di krísis di tal manera ku sektor privá tambe tin representashon den e tim.

Mirando e oumento dramátiko di e último dianan VBC ta di opinion i ta rekomendá gobièrnu pa mas lihé posibel introdusí medidanan ku lo frena e situashon, por ehèmpel hasi e toke de keda mas tempran. Kisas mester konsiderá na hasi esaki no mas lat ku 11’or of 12’or di anochi. Si e sifranan sigui subi manera nan a bin ta hasi último dianan, otro paisnan, entre otro Hulanda lo duna Kòrsou un klasifikashon di kódigo kòrá, pone nos riba lista di paisnan ku riesgo haltísimo i deskonsehá nan hendenan di biaha pa Kòrsou. “Nos mester hasi todo por todo pa evitá e senario aki, pasobra esaki lo ta funesto pa e rekuperashon frágil di último lunanan di nos turismo i nos ekonomia en general.  Ta rekomendabel pa nos gobièrnu hasi tur lokual ta posibel pa evitá un posibel ‘lockdown’ i lo peor pa nos ekonomia.”