WILLEMSTAD.- VCE (Asosashon di doñonan di Kasino di Kòrsou) a aserká gobièrnu tokante prohibishon pa kasinonan risibí kliente.
Pa redukshon di e kantidat di kontagio di COVID-19, gobièrnu a introdusí resientemente konforme areglo temporal medidanan di emergensia ku un karakter eksepshonal.
E areglo aki ta kontené un pakete di medidanan obligatorio ku ta brinda direkshon i restrikshon pa diferente sektor ku eksepshon di un sektor spesífiko: esta e sektor di Kasino. Pa e sektor aki a stipulá un prohibishon pa públiko por drenta kasino. Esaki for di fin di novèmber di e aña aki te por lo pronto.
Ku e medida aki e sektor di kasino i su trahadónan a wòrdu perhudiká i ta sufriendo un daño inmenso.
VCE no ta komprondé esaki konsiderando ku hustamente den konsulta ku gobièrnu e sektor di kasino a invertí engrande den medidanan di protekshon i higiena pa por protehá un i tur.
Riba dia 21 di desèmber 2020 HBN Law & Tax na nòmber di VCE a aserka gobièrnu ku e petishon pa konsulta al final pa logra un solushon pa sobrebibensia di e sektor di kasino.
VCE ta ekspresá e speransa ku gobièrnu riba término kòrtiku lo honra e petishon aki na interes di nos ekonomia i kuponan di trabou.